Кодшо рушарнян «Марий ушем» шыжымсе кумалмашым эртарен
Кодшо рушарнян Йошкар- Ола воктелсе Тумер отышто «Марий ушем» шыжымсе кумалмашым эртарен. Шукын шарнат: тений мартыште шыжым Курык кугыза кумалмаш лиеш манын сӧрымаш ыле. Шошымсо да шыжымсе кумалмашынат тӱҥ шонымашыже Тӱнямбалне ваштареш шогымаш да вӱрым йоктарымаш чарныже манын Юмо деке йодмашым виктарымаш лийын. Жап шот денат юмылтымашым шыжылан палемдыме ыле. Марий ушем сӧрымыжым шуктен. Юмылан надырлан кок тагам да икмыняр комбым пуымо. Молгунамсе дене таҥастарымаште калык утыж дене шуко огыл гынат, 30 наре еҥ чумырген. Ушемын черетан мероприятийже нылымше ноябрьыште лиеш. Курык марий районысо Носолаште марий академик Ксенофонт Сануковлан Чапландарыше кӱм торжественно почыт. Мероприятий 11 шагатлан тӱҥалеш, - увертара Марий Увер.
