Котельный- влакым пӱртӱс газыш кусараш 40 миллион наре теҥгем колтат

Котельный- влакым пӱртӱс газыш кусараш 40 миллион наре теҥгем колтат
             Марий Элыште котельный- влакым пӱртӱс газыш кусараш 40 миллион наре теҥгем колтат. Тидын нерген газификаций шотышто регионысо штабын заседанийыштыже пале лийын. Тудым Республикым вуйлатыше Юрий Зайцев эртарен. Тушто тыгак 2021-ше- 2025-ше ий- влаклан газым ситарыме да газификацийым вияҥдыме программым шуктымым иктешлыме да 2026-шо-2030-шо ий- влаклан мероприятий- влакым палемдыме.
             Кодшо ийын республикыштына 147 меҥге утла газ пучым чоҥымо. Тушечын 96 меҥге утлаже -догазификаций кышкарыште.  Куд муниципал образованийыште 12 ялыш газым пуртымо. Чылаже вич тӱжем утла суртым ушымо. Тушечын кок тӱжем нарыжым догазификаций программе почеш. Тыге Марий Элыште калыклан газым ситерымаш 80,5 процентыш шуын. Тидыже российысе показатель деч шукырак.
             Тений поселкыла кокласе газпучым У Торъял районышто Шура, Шемшӱргӧ да  Талманъял, Алыксий, Крӱк ялла деке, Оршанке кундемыште Нольвож, Нужавлак, Яндыган да Кугу Немдеж, Морко районышто Тат-Кушна, Нурӱмбал, Кугу Шоръял, Яксола да Семисола деке газ пучым чоҥен пытарыме лиеш. Тидын дене пырля куд котельныйым газыш кусарат. Тиде пашалан бюджетыште 40 миллион наре теҥгем палемдыме. Заседанийыште тыгак кугу тӱткышым 2025-ше ийысе догазификацийлан ойырымо. Тиде пашалан 14 миллион теҥгем кучылтмо. Субсидийым 651 еҥ налын. Субсидийым пуымо пашам теният шуйымо лиеш.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски