Воскресенский проспектым тӱзландараш тӱҥалыт
Йошкар-Оласе Воскресенский проспектыште тӱзландарыме тӱшка пашам шуктат. «Ола озанлык директций» виктем «Корно мастер» ушем дене проспектым тӱзландарыме пашам шукташ контрактым пеҥгыдемден. Торг электрон формат дене эртен. Аукционын лектышыже почеш контрактын тӱҥалтыш акшым 12 миллион наре теҥгелан иземдыме. Иктешлыше акше, тудым тенийлан ола округын бюджетышкыже пыштыме, 30 миллионат 550 тӱжем теҥге лийын. Подрядчик Царьград проспект деч Чавайн бульвар марте ужашым шотыш кондышаш. «Парус» виктемын ыштыме, кугыжаныш экспертизым эртыше проектше инфраструктрым кугун уэмдышаш. Тушто тошто бордюр кӱым у дене вашталтат, корно, тротуар, велокорнылаште у асфальтым шарат, южо йолешке участкылаште бетон плиткам оптат. Документацийыште посна тӱткыш оласе йӧнан кумдыкым ыштымылан ойыралтеш: проспектеш теҥгыл ден урнылам, вазон ден декоративный арке-влакым вераҥдат. Тыгак волгыдым пуртышо у 65 меҥгым шындат, корно пале ден разметке- влак лийыт. Тиддеч посна подрядчик пушеҥге ден кушкыл- влакым шында, газоным ышта. «Корно мастер» компаний проектым икымше апрель гыч шыҥдараш тӱҥалшаш, а тӱрыс пашам 30-шо сентябрь марте мучашлышаш. Ушештарена: тений корно пашазе- влак Воскресенский проспектын корно ужашыжым Сеҥымашлан 70 ий темме бульвар гыч тӱҥалын, Чавайн бульвар марте норматив дене келшышым ыштышаш.
Фото: Михаил Винокуров.
Фото: Михаил Винокуров.
