«Кугу Какшан» заповедникыште телымсе шотлымо маршрутым ыштыме
«Кугу Какшан» заповедникыште телымсе шотлымо маршрутым ыштыме. Янлыкым да кайыкым шотлымо телымсе маршрут 6-шо 7-ше февральыште эрта. Тушко заповедникын шанче пашаеҥже да инспекторжо-влак ушнат. Икымше кечын маршрутышто янлыкын кышаже, йолгорныжо лӱмын лум дене петыралтеш. Лумын келгытше висалтеш. Учёт деч ик кече ончыч лум возын гын, кышам петырыдеат лиеш. Янлыкын лум вочмеке кышам кодымыжо тыгеат раш коеш. Кокымшо кечынже тергыме маршрут гоч мыняр янлыкын эртымыже шотыш налалтеш. Теле учёт ятыр ий дене эртаралтеш да заповедник кундемыште могай янлыкын мынярын илымыжым рашемдаш полша.
