Кундемысе эҥерлаште ий кокыт гыч шым сантиметр кӱжгыт марте кылмен

Кундемысе эҥерлаште ий кокыт гыч шым сантиметр кӱжгыт марте кылмен
          Кундемысе эҥерлаште ий кокыт гыч шым сантиметр кӱжгыт марте кылмен. Марий аварийно-утарыше службын утарышыже- влак республикысе вӱдлаште мониторингым эртарат. Тидын годымак калык коклаште умылтарыме пашам шуктат. Изи Какшаныште висымаш ончыктен: Йошкар-Ола кундемыште ийын кӱжгытшӧ кокла шот дене вич сантиметр, Ширяйково кундемыште понтон кӱвар воктене кум сантиметр гына, вӱд мушмо вер- влак улыт. Юл эҥерыште Кокшайск тураште сер воктене гына кылмен, Волжскышто иксаште 3-5 сантиметр, виш вер- влак шуко, ий ӱмбаке лекташ ок лий, «Дачник» сад тураште-5-7 сантиметр. Юриныште- кок-кум сантиметр гына. Тыгак ийыш пураш ок лий. Звениговышто иксаште- 8 сантиметр наре, тушеч лекмаште кылмыдыме вӱд уло, ий 2-4 сантиметр марте кылмен. Таче кечылан утарыше- влак шижарат: ийыш лекташ лӱдыкшӧ.
           Фото: Марий аварийно-утарыше служба.

Прошлые выпуски