Куван кеҥеж мемнан дене чеверласа

Мемнан кундемыште Куван кеҥеж чеверласаш вашка, игече вашталтеш. Кум арня наре жапыште йӱр ыш лий, кечывалым 15-20 градус наре шокшо шогыш, Температура нормо деч 3-6 градус деч шукырак ыле. Тыгайже шуэн лиеда. Октябрьыште кужу Куван кеҥеж 2005-ше, 1974-ше ийлаште лийын. Но октябрьын икымше декадыштыже лум вочмашат лиеда. Мутлан, 2015-ше ийыште лум мландым жаплан леведын, а 1976-шо ийыште эр теле толын да кужу жаплан мландым лум дене леведын. Жап дене шотлымаште теле марте эше кок арня жап уло маныт синоптик- влак, но лишыл каныш кечылаште тудо шкеж нерген шижтара. Эрла кечывалым 10-12 градус шокшо лиеш гын, шуматкечын йӱр ден ночко лум толеш. Йӱдым кок градус марте кылмыкта, кечывалым 3-6 градус леве лиеш. Мардеж йӱдвел-касвел могырым пуа. Рушарнян тыгак лум йӧршан йӱр утларак йога, йӱдым 0 гыч кум градус марте йӱкшемда, кечывалым 5-10 градус леве лиеш. Мардеж кечывалвел- эрвелыш савырна.

Прошлые выпуски