Таче - Покро кече

Православий йӱлам кучышо- влак поро йӱла семын 14-ше октябрьыште Покро пайремым палемдат. Тудо шыжын ик эн тӱҥ пайремжылан шотлалтеш. Марий митрополийыште тиде кечын престол пайремым Кокшайскысе, Упша, Алексеевский, Покровский, Марий Сола, Шнаран, Эмеково селаласе храм- влак палемдат. Йошкар-Олан да Марий Элын митрополитше службым Благовещений кафедральный соборышто эртарен. Ожно Покро деч вара сӱаным ышташ тӱҥалыныт, а ӱдыр- влак тиде кечын черкыш коштыныт да сай качым колташ йодын кумалыныт.
               Таче Покро кечын Йошкар-Оласе рӱдӧ тӱвыра паркыште Тихвин черке воктене Чарла олаште илыше- влакын лулегыштым уэш тойымо олмышто вераҥдыме ырес-монументлан шнуй шӱлышым пуртымо. Тиде сомылым митрополит Иоанн эртарен. Гранит гыч ыштыме Ыресын ончыл могырыштыжо возымо: «Тиде верыште Чарла олаште 18-ше – 20-шо курым тӱҥалтышыште илыше- влакын кодшышт кия», а все могырыштыжо «Юмо ылыжын» кугече саламлымашым вераҥдыме. Парк кундемыште ожно шӱгарла улмаш. Тушто раскопкым эртарыме деч вара кок тӱжем наре еҥын чыла лулегыштым поген ик шӱгарыш тойымо. Ола тӱрысо шӱгарлам 1772-шо ийыште почмо, а 1774-ше ийыште шӱгарла пелен Тихвин черкым чоҥымо. Тиде верыште 1926-шо ий марте еҥ- влакым тоеныт.

Прошлые выпуски