Марий Элыште олтымо тургым аварий да вучыдымо ситуаций деч посна эртен
Марий Элыште олтымо тургым аварий да вучыдымо ситуаций деч посна эртен. Теҥгече Марий Элым вуйлатыше Александр Евстифеев Российын чоҥымаш, илыме вер да коммунал озанлык министрже Владимир Якушевын тиде отрасльысе паша нерген эртарыме селектор совещанийыште участвоватлен. Каҥашыме ик теме олтымо шыже-теле тургымын кузе эртымыже да шушаш олтымо тургымлан ямдылалтме йодыш, тӱлымӧ дисциплина лушкымо жапыште ЖКХ предприятий- влакын роскотыштым иземдымаш, калыкым ЖКХ полышлан онлайн-йӧн дене тӱлаш лийме нерген палдарымаш. Кызытсе жапыште тӱлымаш шагалемын. Сандене тиде пашам сайын виктарен колтыман, - каласен министр. Парымым погаш огыл манын, чыла полышлан жапыштыже тӱлыман, онлайн-тӱлымаш кугу верым налшаш. Республикысе калыкын илыме вер да коммунал полышлан тӱлен шуктыдымо парымже икымше апрельлан шотлымаште ик миллиардат 216 миллион теҥге погынен. Тӱлымашын нылле процентше кассыла гоч ышталтеш. А кызыт тидым ышташ куштылго огыл. Сандене парым эше кугем кертеш. А олтымо тургым сайын мучашлалтеш. Аварий да вучыдымо ситуаций лийын огыл. 30-шо апрель марте пашам ыштыдме кече- влакым увертарымылан кӧра, 6-шо апрель гыч пашам ыштыдыме тӧнежлашке- школ, йоча сад, тӱвыра пӧрт, спорт сооруженийлаш шокшым пуымым чарыме. У олтымо тургымлан ямдылалтме шотышто Чоҥымаш министерстве ден ЖКХ Правительствын пунчал проектшым ямдыленыт. Тушто ямдылалтме мероприятий- влакым раш палемдыме.
