«Марий автоном область» савыктышым цифран форматыш кусарыме
Йошкар-Олаште «Марий автоном область» савыктышым цифран форматыш кусарыме. Чавайн лӱмеш калыкле книгагудын пашаеҥже- влак книга памятник- влакым цифрыш кусарыме пашам умбакыже шуят. «Тӱвыра» калыкле проектым шыҥдарыме кышкарыште Маробиздатын 1928-ше ийыште лукмо краеведений савыктышым электрон вариантыш кусарыме. Очеркым Михаил Янтемир возен. Тудо марий сотемдарче, шанчыеҥ, краевед, географ эа экономист лийын. Тиде пашам тудын илымыже годымак савыктыме. Книгаште «Марий калыкын кӱчык очеркше» уло. Тушто калыкын этнографий ойыртемже, калык озанлык нерген увер, совет кучемым ыштыме йыжыҥ- влакым радамын ончыктымо, совет кугыжанышын калыкле политикыже, административный реформым ыштыме нерген увер- влакым пуымо. Тыгак мланде, климат, кушкыл да янлык тӱня, пайдале ископаемый, ял да чодыра озанлык, промышленность, корно, торговля да коопераций, бюджет нерген возымо. Очеркыште ятыр статистике данный уло. Специалист- влакын мутыш почеш, книга кызытат кӱлешлыкшым йомдарен огыл.
