Марий Эл гыч шолып илыше кок еҥым луктын колтеныт
Марий Эл гыч шолып илыше кок еҥым луктын колтеныт. Узбекистан гыч кок мигрантым Озаҥ оласе аэропорт гыч мӧҥгышт колтымо. Нуно судышто шке титакыштым умыленыт,- увертара суд пристав службо виктем. Узбекистан гыч кок пӧръеҥ оксам ыштен налаш толын, но миграций учётыш шогалын огытыл. Мемнан элыште лийшаш жапышт эртымеке миграций статусым пеҥгыдемдаш манын нимомат ыштен огытыл. Нуно Марий Элыште иленыт да Россий гыч каяш огыл манын тӱрлӧ йӧным кычалыныт. Судышто нуно йоҥылыш лиймыштым умыленыт. Кажныжлан кок тӱжем теҥге штрафым тӱлыктеныт да Россий гыч луктын колташ ыштеныт. Суд пристав- влак Озаҥысе аэропортын тергыме да пропуск пунктшо гоч нуным мӧҥгышт колтеныт. Эртыше ийын чылаже шолып илыше 20 йотэл еҥым кучымо, 15 –шым мӧҥгышт колтымо. Нуно Таджикистан, Узбекистан, Туркменистан, Казахстан, Молдова да Китай гыч улыт. Нуно оксам ыштен налаш але тунемаш толыт, но миграций учётыш шогалаш огыт вашке.
