Марий Эл гыч спортсмен- влак парашют спорт дене Россий кубкын икымше йыжыныштыже призёр лийыныт
Марий Эл гыч спортсмен- влак парашют спорт дене Россий кубкын икымше йыжыныштыже призёр лийыныт. Йошкар-Олаште 20-шо гыч 24-ше февраль марте парашют спорт дене «Атлетике многоборье» дисциплиныште таҥасымаш эртен. Тушто мландыш чаткан волен шичмаш, шӱдӧ метрыш иймаш, ече дене пӧръеҥ- влаклан вич меҥге, ӱдырамаш-шамычлан-кумыт, лу метр тора гыч винтовко дене лӱйкалымаш пура. Российын лу субъектше гыч 44 спортсмен таҥасен,- увертара ДОСААФ. Сеҥыше- влак тыге радамлалтыныт: ӱдырамаш- влак коклаште Краснодар край гыч Ольга Балина ден Наталья Завьялова икымше ден кокымшо верым налыныт, Марий Эл гыч Вера Алис кумшо лийын. Пӧръеҥ- влак коклаште ончылно Марий Эл гыч Николай Ягодаров, Краснодар край гыч Сергей Балин кокымшо, Марий Эл гыч Радик Саляхиев кумшо лийыныт. Команде- влак коклаште икымше вер Краснодар крайлан логалын, кокымшо верыш Татарстан ден Башкортостанын спортсменже- влакын «Чебурашка» командышт лектын, кумшо верым Марий Элын командыже налын. Марий командыште Вера Алис, Николай Ягодаров да Александр Сергеев лийыныт.
Фото: ДОСААФ-ын Марий Элысе пӧлкажын пабликше.
Фото: ДОСААФ-ын Марий Элысе пӧлкажын пабликше.
