Марий Элым вуйлатыше Пекиныш каен

Марий Элым вуйлатыше Пекиныш каен

Марий Элым вуйлатыше Юрий Зайцев таче кокымшо кече Федерал Собранийын делегацийже дене пырля Китай Калык Республикыште. Делегацийым Россий парламентын кӱшыл палатыжын председательже Валентина Матвиенко вуйлата. КНР-ын политикше-влак дене вашлиймаште тӱнямбалне пуламыр жапыштат Россий ден Китай коклаште умылымаш улмо нерген ойлалтын. Тӱнямбал кӱкшытыштӧ политический да экономический кыл вияҥеш веле. Ончыкыжым тудо эшеат пеҥгыдырак лийже манын, Россий Федерацийысе субъект-влак да КНР-ын провинцийже-влак икте-весышт дене утларак кылым кучышаш улыт. Тиде амал денак Пекиныш кайыше делегацийыш икмыняр субъектын представительышт пуреныт. Нунын коклаште – Юрий Зайцев. Тиддеч ончыч Марий Элым вуйлатыше палемден: «Пытартыш ийлаште регионын Китайын икмыняр провинцийже дене торгово-экономический, научно-технический да гуманитарный шӧрынлаште сай кыл ышталтын. Умбакыже тиде паша моло провинций-влак денат ышталтшаш».

Прошлые выпуски