Чодыра пожар-влак шумлык
Пожар лӱдыкшӧ тургым тӱҥалме жап гыч Марий Элыште 23 чодыра пожар лийын. Тул 18 гектар кумдыкым авалтен. 17 ганаже пожар тулым шекланыде кучылтмылан кӧра ылыжын. Кудытшылан амалым кӱдырчан йӱр ыштен. Кызыт республикыштына пожар ваштареш виктаралтше посна режимым увертарыме. Тудын годым чодыраште да чодыра воктене тулотым ылыжташ чарыме. 1-ше-3-шо классан пожар лӱдыкшӧ годым чодырашке эше пураш лиеш гын, 4-ше-5-ше класс годым еҥ-влаклан да транспортлан корным петырат. Чодыраште пожар лӱдыкшӧ правил-влакым пудыртылмылан 40-50 тӱжем теҥге штрафым тӱлыктат.
