Марий Элым вуйлатышын кӱштымыж почеш, Йошкар-Олаште монастырь комплексым тений чоҥен пытарат
Марий Элым вуйлатышын кӱштымыж почеш, Йошкар-Олаште монастырь комплексым чоҥен пытарат. Богородице-Сергиев ӱдырамаш монастырьын Входоиерусалимский черкыжым 2007-ше ийыште чоҥаш тӱҥалме. Тиде жапыште икмыняр подрядчик вашталтын, но объектым мучашлыме огыл. Тачысе кечылан зданийым леведыш йымаке пуртымо, окнам, омсам шындыме, икмыняр электромонтаж пашам шуктымо. Марий Элым вуйлатыше черкын фасадшым, кӧргӧ пӧлемже- влакым ончен лектын. Тудо палемден: чоҥен пытарыме йодышым лишыл жапыште виктарен колтыман. Тиде комплекс тӱвыра министерствын блансыштыже шотлалтеш. Республикын бюджетше гыч оксам пыштыме. 14 ий эртен объект дене пашам иктат ок ыште. Мучашлаш шокшым, электротулым, вӱдым ситарыме, вентиляций, шикшым лукшо системым, оролымо да пожар сигнализацийым ыштыман, кӧргӧ отделке пашам, технологий оборудованийым налын шындыман. Тӱн ырыктыше системе деке але посна газ котельный деке ушаш кӱлеш. Республикым вуйлатыше тыгак воктене шогышо кок пачашан аварийный пӧрт деке тӱткышым ойырен. Тудо тошто пӧртла гыч калыкым кусарыме икымше программыш пурен огыл. Но тудым спискыш пурташ лийме йодышым ончен лекташ кӱштен.
