Марий Элыште школ лесничестве-влакын слетышт эртен
Марий Элыште школ лесничестве-влакын слетышт эртен. Тушко республикынан 14 районжо гыч 64 тунемше ушнен. Тыгак куд пошкудо регион гыч 24 ӱдыр ден рвезе толыныт. Икымше кече гычак йоча-влаклан тӱрлӧ тунемме занятийым эртареныт. Кокымшо кечын тунемше-влак «Чодыра многоборье» этапыште шке чолгалыкыштым ончыктеныт. А школ лесничествым вуйлатыше-влак ты кечын семинарыште лийыныт. Нуно пашаштым вияҥдыме нерген каласкаленыт, шке опытышт дене пайлалтыныт. Слётын пытартыш кечынже «Чодырам аралена» акций эртен. Ты кечынак сеҥыше-влаклан диплом ден пӧлекым кучыктеныт. 3-шо верым Киров кундем Яранск оласе Жарков лӱмеш 2-шо номеран школ ден Морко районысо Унчо школын тунемшыже-влак сеҥен налыныт. Татарстан гыч «Лесхоз кыдалаш школ» да Медведевысе Шойбулак школ 2-шо вер дене палемдалтыныт. Куженер районысо Руш Шой кыдалаш школын тунемшыже-влак ты гана эн виян лийыныт. Нуно 1-ше верым сеҥен налыныт.
