Марий Элыште таче кум кечаш сайлымаш шке пашажым тӱҥале

Марий Элыште таче кум кечаш сайлымаш шке пашажым тӱҥале
              Марий Элыште таче кум кечаш сайлымаш шке пашажым тӱҥале. 6-шо, 7, 8-ше сентябрьыште 8 шагат эр гыч 8 шагат кас марте 494 сайлыме участке пашам ышта. Кугыжаныш Погыныш, «Йошкар-Ола» ола округыш да верласе самоуправлений органлаш депутат- влакым сайлымаш кая. Икымше гана республикыште дистанций гыч йӱклымӧ йӧн кучылталтеш. Начар тазалыкан- влакланат сайлаш чыла йӧным ыштыме. 12 участкыште сурдопереводчик- влак пашам ыштат, 23 участкыште Брайль шрифтым кучылтын бюллетеньым шке возаш трафаретым ямдылыме.
              Ик эн ончыч шке йӱкыштым Марий Эл кугыжаныш Погыным вуйлатыше Анатолий Смирнов, партийлан еҥышт, Правительстве вуйлатышын икымше алмаштышыже Евгений Кузьмин, Правительствым вуйлатышын алмаштышыже- тӱвыра министр Константин Иванов да молат пуэныт.
             Теҥгече Россий ЦИК-ын увер рӱдерже пашам ышташ тӱҥалын. Тудо сайлымаш чын эртыже манын да сайлыме комиссий ден сайлыме процессын участникше- влак коклаште увер кылым ышташ манын ышталтын. Марий Элын сайлыме комиссийжат тиде процессыште участвоватла,- увертарен сайлыме комиссийым вуйлатыше Ирина Татаринова. Увер рӱдер вич кече 5-ше гыч 9-ше сентябрь марте сайлыше- влакым сайлыме кампанийын кузе кайымыже дене палдарен шогаш тӱҥалеш.
               Республикысе калык Кугыжаныш Погынын 52 депутатшым да муниципал образованийлан представительный органыштын тӱжемат 301  депутатшым сайла.
          Фото: «Марий Элысе сайлыме комиссий» ВК.

Прошлые выпуски