Марий калыкын 11-ше погынжын участникше- влак дене вашлиймашке республикым вуйлатыше Александр Евстифеев миен
Теҥгече Марий калыкын 11-ше погынжын участникше- влак дене вашлиймашке республикым вуйлатыше Александр Евстифеев миен ыле. Тушко Российысе 19 кундем гыч 400 наре делегат толын. Республикым вуйлатыше этнокультурный поянлыкым ешарымаште да вияҥдымаште тудын кӱлешлыкшым палемден. Республикыште кундемнан 100 ияш лӱмгечыжлан ямдылалтмаш кая манын. Ямдылалтме кышкарыште историй зданий –влакым олмыктымо кугу паша шукталтеш да у тӧнеж- влак чоҥалтыт. 2018-ше ийыште олмыктымо деч вара Андрей Эшпай лӱмеш Кугу концерт зал почылтын. Кодшо ийын октябрьыште Шкетан театрым олмыктен почмо. Чавайн книгагудышто пашам мучашлыме. Тиддеч посна Марий филармонийын полатше чоҥалтеш. Тудым шушаш ийын ыштен ыштен шуктышаш улыт. Тыгак тудо каласен: районлаштат тӱвыра илышым правительство шке шинча ончылныжо куча. Кодшо ийын ялласе вич тӱвыра пӧртым олмыктымо. Туныктыш, медицина, ЖКХ, корным чоҥымо пашаштат сай вашталтыш- влак улыт. Тунемме книгам лукташ оксам ойырымылан кӧра марий йылме дене тичмаш радам учебникым савыктыме, калыкын историйже да тӱвыраже дене тунемме материал- влак лектыныт. Погыныш толшо- влаклан глава лектышан пашам, у сеҥымаш- влакым тыланен да уна- влакын мер пашаштым аклен Кугыжаныш наградым да Чап лӱм- влакым кучыктен. Мутлан Параньга муниципал районым вуйлатыше Любовь Михеева «Марий Эл ончылно надырлан» кокымшо степенян орденым кучыктен. Орденын медальжым тыгак Надежда Алатайкина, Эдуард Александров, Василий Пектеев налыныт. «Марий Эл тӱвыран сулло пашаеҥже» лӱмым Наталья Пушкина ден Марий тӱвыра рӱдерын пӧлкажым вуйлатыше Раисия Николаевалан пуымо. Оршанке велысе Тошто Крешын ялыште «Пу вий» мер ушемым вуйлатыше Виталий Кудрявцев да тӱрлызӧ Ираида Степанова «Марий Элысе художественный промысел да ремеслон калык мастерже» лӱм дене палемдалтыныт. Ӱшнур школын директоржо Влерий Галкин ден Карай школым вуйлатыше Любовь Сергеева «Марий Элын калык туныктышыжо» лӱмым сулен налыныт. А калыкле президент интернат-школым вуйлатыше Лидия Иксанова «Марий Элысе туныктышын сулло пашаеҥже» лӱмым налын. Тиддеч посна тӱвыра тӧнеж- влакым вуйлатыше-шамычлан у автобус деч сравочым кучыктымо. Марий филармоний, Шкетан театр, Марий самырык театр у автобусан лийыныт.
