Медведево районысо кыдалаш школын тунемшыже- влак тунемме чырыкым у зданийыште тӱналыныт

Медведево районысо кыдалаш школын тунемшыже- влак тунемме чырыкым у зданийыште тӱналыныт
                 Медведево районысо кыдалаш школын тунемшыже- влак тунемме чырыкым у зданийыште тӱналыныт. Руэм посёлкысо кыдалаш школын у корпусыштыжо кок спортзалым, скалодромым, 32 тунемме кабинетым, кочмо верым, книгагудым да мастерсткойым ыштеныт. Школын у оралтыжым 2023-шо ийыште чоҥаш тӱҥалме, пашам 2024-ше ийын шыжым мучашлыме. Кодшо идалык мучашыште туныкташлан лицензийым налме. Школ шке омсажым тунемше- влаклан тений январьыште почын. У зданийым чоҥымылан кӧра школ кум пачаш шукырак йочам налын кертеш,  тунемше- влаклан ешарен 725 верым ыштыме. Ынде тушко шинчымашым налаш посёлкысо гына огыл, пошкудо ялла гычат коштын кертыт. Марий Элым вуйлатыше Юрий Зайцев тунемме тӧнежым ончен лектын,  йоча ден туныктышо, ача-аваштым у тунемме верым почмо дене саламлен. Тунемме тӧнеж кумдыкышто стадионым уэмдыме, школын улшо зданийжымат капитально олмыктымо. У корпусын кӱлешлыкше шукертсек шижалтын. 420 еҥлан келыштарыме икымше корпусшым 1969-ше ийыште чоҥымо. Йоча- влак ешаралтмылан кӧра кок смене дене тунемаш верештын.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски