Мер пашаеҥ- влакым Республикым социал- экономик велым вияҥдыме индивидуал программын у редакцийышкыже шке темлымашыштым пурташ ӱжмӧ

               Марий Элым вуйлатыше мер пашаеҥ- влакым Республикым социал- экономик велым вияҥдыме индивидуал программын у редакцийышкыже шке темлымашыштым пурташ ӱжын. Тидын нерген тудо мер инициативылан полышым пуышо толкынын форумыштышт ойлен. Мероприятий Эрик Сапаев лӱмеш опера да балет марий кугыжаныш академический театрыште эртен. Республикым вуйлатыше палемден: поро йӱла семын залыш эн чолга еҥ- влак погыненыт. Вара мер калыкын тӱҥалтышыштлан кӧра лийше вашталтыш-влак нерген ойлен. Республикыште калыкын тӱҥалтышыжым тӱрлӧ аланыште илышыш шыҥдарыме кугу сай опыт погынен. Тиде- тӱшка кумдыклам тӱзландарымаш, калык йӱлам аралымаш, неле илыш йыжыҥыш логалше еҥ-влаклан полшымаш, кугурак тукым нерген шарнымашым кодымаш, таза илыш йӱлам шарен колтымаш да молат. Кодшо ийын Российын Президентше Владимир Путин правительствылан калыкын кӱлешан тӱҥалтышыжым шындарыме комплексный механизмым ышташ кӱштен ыле. Тиде жапыште толкын шуко кумылан еҥым чумырен. Кеҥеж тӱҥалтышыште толкыным вуйлаташ у еҥым шогалтыме деч вара калыкын ятыр темлымашыжым чумырымо. Нуным шыҥдараш республикын бюджетше гыч 122 миллион теҥгем ойырымо. Оксам кучылтмо тыгай проект ятырыш погына. Тиде- Арде селаште кӱварым олмыктымо, Визымйар школ ончылно площадкым асфальтироватлыме, Кугу Ӧршаште корным олмыктымо, Изи Пуялыште дамбым ачалыме да молат,- калалсен Александр Евстифеев. Тудо погынышо- влаклан индивидуал программын у редакцийышкыже темлымаш- влакым ышташ кӱштен. Программым уэмдымаш Россий Правительство вуйлатышын алмаштышыже Дмитрий Чернышенкон вуйлатымыж почеш ышталтеш. Мучашлан республикым вуйлатыше форумын участникше- влаклан тыгаяк чолга лияш тыланен да сулен налме наградым кучыктен. Республикым вуйлатышын тауштымашыжым Картук селан старостыжо Виталий Артюшовлан, Васильево школышто арулыкым эскерыше Нинель Зайцевалан, Медведево посёлкысо ветеран Советым вуйлатыше Людмила Карапетянлан, Каракша ялысе ветеран советым вуйлатыше Наталья Шашковалан, Кугу Вараҥыж ялын старостыжо Юрий Ясмурзинлан увертарыме.

Прошлые выпуски