Москошто Марий Элым социально- экономически вияҥдыме йодышым каҥашыме
Российысе чоҥымаш министерствыште Марий Элым социально- экономически вияҥдыме йодышым каҥашыме. Теҥгече тушто Александр Евстифеев икмыняр пашаче вашлиймашым эртарен. Нуно республикым вияҥдыме индивидуальный программе дене кылдалтыныт. Республикым вуйлатыше журналист- влаклан каласен: программын пытартыш редакцийже шотышто деловой мутланымаш- влак лийыныт. Паша умбакыже шуйна. Тудын финалже семын Марий Элыш Элын премьер- министржын вуйлатыме Правительственный делегацийын визитше лийшаш. Александр Евстифеев тыгак республикын кураторжо Владимир Якушев дене вашкыл нерген ойлен. Владимир Владимирович республикын йодышыжо- влак дене чак пашам ышта. Тудын паша планыштыже республикыш толмо нерген пункт эре уло. Лишыл жапыште ме тудым шуктымо пашам аклаш ӱжына, манын. Республикым социально- экономически вияҥдыме индивидуальный программе инвестиций куатым кугемдаш, парымым шагалемдаш, транспортым ситараш, инженер инфраструктурым вияҥдаш виктаралтын. Программе почеш кӱлешан объект- влак чоҥалтшаш, корным норматив марте шукташ да моло пӱсӧ паша- влак шукталтшаш улыт.
