Москошто лӱмлӧ композитор Андрей Эшпайлан 100 ий темме лӱмеш концерт- влак эртат
Москошто Марий Эл гыч лӱмлӧ композитор Андрей Эшпайлан 100 ий темме лӱмеш концерт- влак эртат. Марий калыкын эргыже Андрей Яковлевич Эшпай СССР-ын да РСФСР-ын калык артистше лийын. 19-ше февральыште сымыктыш пашаеҥ- влакын рӱдӧ Пӧртыштышт Андрей Эшпайын лирике мурыжо- влакым колышташ лиеш. Нуным эстрадын мастарже- влак- Российын калык артистше Геннадий Каменный, Российын сулло артистше- влак Лилия Ерохина, Галина Улетова, Россий да тӱнямбал конкурслан лауреатышт Юлия Загоскина, Аида Маликова, Руслан Авдеев, Игорь Стариков, Александр Шалунов мурат. Чайковский лӱмеш концерт залыште концерт 19-ше майыште лиеш. Дирижер Сергей Скрипкан вуйлатыме кинематографийын Россий кугыжаныш симфонический оркестрже «Ночной патруль», «Жажда», «Карьера Димы Горина», «Приходите завтра», Им покоряется небо», «Первый троллейбус», «Майор Вихрь», «Директор», «Адъютант его превосходительства» да моло фильм- влаклан возымо семже- влакым шокта. Ушештарена: Андрей Эшпай 1925-ше ий 15-ше майыште Козьмодемьянск олаште шочын. Вара ешыже Москош илаш куснен, но композиторын усталыкше тудлан изи годсек палйме марий калык семын шӱлышыжӧ дене ташлен.
Фото: ВК-ште Сымыктыш пашаеҥ- влакын рӱдӧ Пӧртыштын афишыже
Фото: ВК-ште Сымыктыш пашаеҥ- влакын рӱдӧ Пӧртыштын афишыже
