Паша дисциплиным пудыртет гын, окса деч посна кодат
Пандемий тургымышто пашаверым ситарыме шотышто органлаште паша ятырлан ешаралтын. Кажне кечын тушко 300 наре йодмаш пура. Шукыштым учетыш шогалме йодыш тургыжландара. Еҥ-влак могай документ кӱлмым, пашадымылык шотышто пособийын кугытшым, кугыжаныш полыш шотышто йодышым рашемдат. Каласен кодыман: 1-ше март деч вара паша деч посна кодшо-влаклан апрель гыч июнь марте пашадымылык пособий 12 тӱжем 130 теҥге лийын. Кӧн ийготыш шудымо йочаже уло, кум тӱжем дене эше ешарен тӱлат. Тидымат палыман: кӧ дисциплиным пудыртылмылан кӧра пашавер деч посна кодын, нунылан тыгай полыш огеш пуалт.
