Паша график почеш кая
Марий Эл вуйлатыше Юрий Зайцев рӱдолаштына икмыняр инфраструктур да социал проектын илышыш кузерак шыҥдаралтмышт дене палыме лийын. Тудо Семеновко селаште тулык икшыве-влаклан чоҥалтше пӧртым ончал савырен. Паша график почеш кая. Шуко пачеран пӧрт идалык мучашлан ямде лийшаш, у пачер деч сравочым 100 наре еҥлан кучыктат.
Тыгак регионым вуйлатыше Олимпий резерв училищыште чоҥалтше спортзаллан акым пуэн. Ты объектым «Бизнес-спринт» федерал проект почеш чонат. Спортзалыште мини-футболлан капкам, шведский стенкым да шуко у тренажерым шогалтат. Спорт объект кумдыкым уремыштат тӱзатат. Тушто воркаут, стритбаскет, волейбол площадке-влак, велопарк, скандинав коштмашлан корно, каныме вер лийыт. Лишыл жапыште кугу ачалыме паша Училищым да тӱшкагудымат вуча.
