Промышленность министр Станислав Крылов «Йошкар-Оласе хладокомбинатыш» миен
Йошкар-Оласе хладокомбинатыште пашаче вашлиймаш. Теҥгече Республикысе промышленность министр Станислав Крылов «Йошкар-Оласе хладокомбинат» иземдыме ответственностян ушемыш миен. «Мари Айс» республикыштына мороженыйым ыштен лукшо кугу предприятийлан шотлалтеш. Сатун ятыр ужашыже республике деч ӧрдыжкӧ колталтеш. Пашаче вашлиймаште предприятийым вияҥдыме, ассортиментым кугемдаш у технологий оборудованийым налме нерген ойлымо. Тыгак республикысе кевытлаш да федерал ужалкалыме сетьлаш мороженый ден кылмыктыме десертым ончыкжым колтымо нерген мутланыме. Идалык еда тушто у продукций- влак ямдылалтыт да калыкын йӧратен шындыме сатужо шукырак лукталтеш. Ыштыме пытартыш у сатулан каза шӧр негызеш ямылыме мороженый, иван-чай да емыж негызеш ыштыме ий шотлалтеш. Чыла продукцийым республикысе сай качестван да экологически яндар сырьё гыч лукталтеш.
