Республикыштына эше ик Чап лӱмым пуаш тӱҥалыт
Таче Марий Эл Кугыжаныш Погынын кудымшо сессийже пашам ыштен. Повесткыш 18 йодышым пуртымо. Депутат- влак обязательный медицина страхований фондын бюджетышкыже, южо янлыкым кучаш разрешенийым шеледыме радамыш, мировой судьян удостоверенийже нерген положенийыш вашталтышым пуртеныт, шала коштшо пий ден пырысым кучаш верысе самоуправлений органлан пуымо полномочийын вийжым пытымылан шотленыт. Республикын икмыняр законжым федерал закон дене тӧр кондымо. Тиддеч посна моло законопроектымат ончен лектыныт. Каҥашыме эше ик йодыш Республикын у почётан лӱмжым пеҥгыдемдымаш дене кылдалтын ыле. Кидпаша мастар- влаклан «Калык мастар» Чап лӱмым пуаш тӱҥалыт.
