Республикыштына сур лудо- влакым шотлат

Республикыштына сур лудо- влакым шотлат
             Республикыштына сур лудо- влакым шотлат. 20-шо гыч 21-ше январь марте Российын Европа вел ужашыштыже, Юл кундемыште, Кечывалвел Сибирьыште да Уралыште вӱдыштӧ илыше кайык- влакым учётыш налыт. Российысе кайыкым оролышо Ушем тыгай мониторингым 15 ий наре эртара. 2015-ше ий гыч тудо Россий кӱкшытан акций формым налын да «Сур шӱй» лӱман лийын. Марий Элат тиде шотлымашке ушна,- палемда регионысо пӱртӱс поянлык министерстве. Орнитолог- влак умылтарат: вӱдыштӧ ийше ятыр кайыкше йӱштылан кӧра огыл шокшо велыш чоҥешта, а йӱштӧ годым вӱд кылмымылан кӧра кочкышым муаш йӧсылан. Плотина- влак шочмылан, ГРЭС-ла гыч леве вӱдым йоктарен лукмылан кӧра вӱд кылмен ок шу, лач тушто кайык- влак погынат. Россий пӱртӱс поянлык министерствын увертарымыже почеш, Российын Европа вел могырыштыжо ятыр олаште, Урал ден Сибирьыште телым куд тӱрлӧ лудым, южо вере колшыре ден чарлаҥгымат вашлияш лиеш. Марий Элыште кайыкым шотлаш чыла кумылан- влак полшен кертыт. Тидлан бинокльым, вӱд кумдыкын схемыжым, блокнотым, карандашым налман да кайык илыме верым палаш кӱлеш. Шинча дене шотлымым фотосъемко дене пеҥгыдемдаш кӱлеш. Лектышыжым акцийын координаторжылан колтыман.

Прошлые выпуски