Йошкар-Ола «Паша дене чапланыше ола» лӱм верч кучедалеш
Йошкар-Ола «Паша дене чапланыше ола» лӱм верч кучедалеш. Тидын шотышто ола администрацийыште оргкомитетын заседанийже эртен. Федерал инициативышке ушнаш Ветеран- влакын Марий Республикысе да Йошкар-Оласе организацийышт темленыт. Ветеран организацийлаште ушештареныт: Кугу Ачамланде сар ийлаште марий рӱдӧ олаш икмыняр завод ден институтым эвакуироватлыме улмаш. Тиде- Одессысе киноаппаратура заводым, Москосо «Компрессор» заводын ужашыжым, Москосо оптико-механичсекий заводым, Ленинградысе Кугыжаныш оптик институтын опытный заводшым, Октябрьлан 13 ий темме лӱмеш ужалкалыме виса- влак завод, Кугыжаныш оптик институтым. Эвакуироватлыме предприятий- влак чарныде фронтлан военный продукцийым ситарен шогеныт. Тудо жапыштак Йошкар-Олаште лӱмлӧ учёный, академик- влак пашам ыштеныт: Сергей Вавилов, Иван Гребенщиков, Александр Лебедев, Владимир Линник, Александр Теренин. Марий машиностроитель завод элнан Вооружённый вийжым вияҥдымашке кугу надырым пыштымыжлан СССР-ын эн кӱшыл наградыже- Ленин Орден дене палемдалтын, а полупроводник прибор- влак заводлан Кугу Ачамланде сарын икымше степенян орденжым пуымо. Тыгак кызыт Марий Элыште 20 тӱжем утла еҥ «Сарын йочаже- влак» статус дене ила. Моло ойыртемалтше пример-влакым кычалме пашам МарНИИЯЛИН пашаче группыжо шукташ тӱҥалеш. Кызыт «Паша дене чапланыше ола» Чап лӱмым 63 ола нумалеш.
