Россий конкурсыш «Звенигово» озанлык гыч намийыме чыла сату шӧртньӧ медальым сеҥен налын
Россий конкурсыш «Звенигово» озанлык гыч намийыме чыла сату шӧртньӧ медальым сеҥен налын. Москосо эксперт- влак шыл комбинатын сатужым кӱкшын акленыт. Элысе тӱрлӧ олаште илыше- влак «Звенигово» шыл комбинатын сатужо дене сайын палыме улыт. Тудын ошвуян патырым сӱретлыман «Чыла вий-шылыште» возыман логотипше вигак палыме да тутло сийын гарантийже улеш. Тений Москошто ончер 4-ше гыч 7ше октябрь марте лийын. «Шӧртньӧ шыже» выставкыш тӱрлӧ кундем гыч тӱжем дене таҥасыше миен. Нуно ваш-ваш палыме лийыныт, опыт дене палдареныт да продукцийыштым ончыктеныт. «Звениговский» лу тӱрлӧ сатужым намиен. Чылажат шӧртньӧ медаль дене палемдалтын. Нунын коклаште сардельке ден колбаса, консерве дене сосиске, шыл деликатес лийыныт. Тыге ойлат: агрохолдинг эше шукырак сатужым намия гын, кажныжлан шӧртньӧ медальым налеш ыле, очыни.
