Российысе чоҥымаш министр ден Марий Элым вуйлатыше республикым социально- экономически вияҥдыме программым каҥашеныт
Российысе чоҥымаш, илыме вер да коммунал озанлык министр Владимир Якушев ден Марий Элым вуйлатыше Александр Евстифеев республикым социально- экономически вияҥдыме программым каҥашеныт. Федерал министр теҥгече губернатор- влак дене селектор совещанийым эртарен. Республикым 2020-шо 2024-ше ийлаште вияҥдыме индивидуальный программе улшо чарак- влакым шагалемдымашке виктаралтын. Тушто инвестиций программе-влакым шыҥдараш йӧным ышташ, транспорт инфраструктурым саемдаш да вияҥдаш, ЖКХ инфраструктурым уэмдаш, электротуллан кӱкшо тариф дене кылдалтше йодышым виктарен колташ, изи да кыдалаш бизнесым да туризмым вияҥдаш, калыкын нужналыкшым шагалемдаш, пашаверым да калыкын парышыжым ешараш палемдыме. Республикым вияҥдыме индивидуальный программым лишыл жапыштак пеҥгыдемдыман. Тыгай практике уже уло. Кодшо кечылаште Курган областьын программыжым пеҥгыдемдыме. А оксам ӱшанлын ойырымо лиеш. 2024-ше ий марте вич миллиард теҥге пуалтеш. Икымше йыжыҥже сайын шыҥдаралтеш гын, 2024-ше ий деч вара эш вич миллиард ешаралтеш. Тиддеч посна, калыкле проект- влак корно дене пурышо оксам кучылтман, - каласен Владимир Якушев.
