Сай лектышым налше да тудым ужалаш нелылыкым шижше аграрий- влаклан полышым пуат

Сай лектышым налше да тудым ужалаш нелылыкым шижше аграрий- влаклан полышым пуат
Тений сай шурно да саска лектышым налше да нуным ужалаш нелылыкым шижше аграрий- влаклан полышым пуаш тӱҥалыт. Тидын нерген Республикым вуйлатыше Александр Евстифеев ден ял озанлык министр Александр Гречихон вашлиймаштышт ойлымо. Республикым вуйлатыше каласен: мый дечем икмыняр фермер лектышым ужалаш полшаш йодын. Аграрий- влак министерстве деч налше еҥым муаш полышым вучат. Нуно ужалынешт. Южо фермерын аралыме верже начар але йӧршынат уке. Поснак саска шотышто нелылык лектеш. Йӱшто марте ужален колташ кӱлеш. Александр Евстифеев министр деч тыгак пасу паша кузе кайыме нерген йодын. Министр тыге вашештен: неле игечым ончыде, пасу пашаеҥ- влак 260 тӱжем тонн пырчым поген налыныт, лектыш 23 центнер. Ӱмаште 20 утла центнер дене 253 тӱжем тонным погымо ыле. Пареҥгым ик гектар гыч 243 центнер дене налме да 46 тӱжем тонным погымо. Кызыт технический да ӱян культурым погат. Рапсым тӱжемат 800 гектар гыч поген налме, йытыным 495 гектар гыч. Кукурузым кум тӱжемат 400 гектар гыч умбакыже погат. Нӧрӧ да чоштыра кормам ситышын шапашлыме. Кокияшым келшыше жапыште ӱден шуктымо. Тудым 37 тӱжем гектареш вераҥдыме. Мландым кылмаш куралыт. Кызытеш тудым 37 тӱжем гектарым пушкыдемдыме. Икияш пырчан культурым ӱдашлан 18 тӱжем тонным аралаш пыштыме, кокияш культурым- куд тӱжемат пеле тонным. Тидыже планын 80 процентше лиеш. Тиде паша умбакыжат шуйна.

Прошлые выпуски