«Сеҥымаш урем» патриот проектыш Марий Эл гыч 8 район ушнен
«Сеҥымаш урем» патриот проектыш Марий Эл гыч 8 район ушнен. Кугу Сеҥымаш вашеш тиде проект элысе 83 кундемыште шыҥдаралтеш. «Марий Элысе корно-влак» программын ончыктымыж почеш, Марий АССР гыч Йошкар-Армий радамыш 142 тӱжемат 537 еҥым налыныт. Тушечын 74 тӱжемат 878 еҥже сӧй пасуэш вуйжым пыштен. Патырлыкым ончыктымылан 45 землякланна «Совет Ушемын Геройжо» кӱкшӧ лӱмым пуымо. Совет калыкын подвигшым Йошкар-Оласе 37 урем, бульвар, площадьын лӱмешышт аралаш кодымо, чапкӱ да мемориал оҥа- влакым вераҥдыме. Кугу Сеҥымашым палемдыме идалыкыште «Сеҥымаш урем» проектым шыҥдараш корно фонд гыч Республикын Правительствыже оксам ойырен. Урем ден тротуарлам 8 районысо 10 илемыште да оласе Сеҥымаш бульварыште олмыкташ палемдыме.
