Сеҥымаш Паркын икымше ужашыжым тӱзландарыме

Сеҥымаш Паркын икымше ужашыжым тӱзландарыме
Теҥгече Марий Элым вуйлатыше Александр Евстифеев Йошкар-Оласе Сеҥымаш Паркым тӱзландарыме пашам ончен. Тушто Кугу сеҥымашлан 75 ий темме вашеш да историйым шарнымашеш кодаш манын, Герой- влакын аллейыштым ыштен шуктымо. Тушко кӱртньӧ гыч ыштыме стеле- влакым вераҥдыме, кажныштыже Совет Ушемын, Российын Геройжо, Слава орденын тичмаш кавалерже- влакын лӱмыштым возымо. Чылаже 14 стелым вераҥдыме, 77 еҥын лӱмыштым возымо. Тушечын 56-шо Совет Ушемын Геройжо, визытше- Российын Геройжо, Слава орденын 16 тичмаш кавалерже улыт. Олан мэржын мутшо почеш варарак, иктаж мартыште, смартфон полшымо дене герой- влак нерген тичмаш уверым пален налме проект шыҥдаралтеш. Герой- влакын аллейыштым чоҥымо нерген Ленин лӱмеш тӱвыра полатын директоржо Хаджимурат Гуцунаев каласкален: кугу пашам ыштыме, асфальтым шарыме, бордюрым, брусчаткым вераҥдыме, тӱжвал волгалтарыме системым келыштарыме. Паркыш пурымо композиций ышталтын, шукерте огыл катокым кылмыктыме. Чыла темлымашым калык деч погымо да заказчик- влаклан ойлымо, нуно илышыш шыҥдареныт. Шошо гыч тылыште тыршыше- влакын аллейышт шочшаш, военный технике выставке кумдаҥшаш, танк, пушка, эше вертолёт лийшаш. Шошым освещенийым ыштен пытарена да шудым ӱдена да кушкылым шындена, - каласен Хаджимурат Гуцунаев. Александр Евстифеев паркым ончен савырнымек, пашам сайын шуктымым палемден да сарзе техникым вераҥдыман парк кажне районышто лийшаш манын. Тидыжат оҥай: Сеҥымашлан 75 ий темме дене пырля, шушаш ийын тиде парк шкежат 70 ияш лӱмгечыжым палемдаш тӱҥалеш.

Прошлые выпуски