Шымше ноябрь - шарнымашан кече

Шымше ноябрь - шарнымашан кече
            Шымше ноябрьым Йошкар-Олаште концерт, салтак пучмыш да кычалше- влакын выставкышт дене палемдат. Эрла рӱдӧ олаштына Москосо Йошкар площадьыште лийше 1941-ше ийысе лӱмлӧ парадлан 85 ий теммылан пӧлеклалтше пайрем мероприятий лиеш. Тунам Моско деке немыч войска чак лишемын, тале кредалмаш каен. Тиде неле жапыште элым вуйлатыше- влак парадым эртараш пунчалыныт. Тиде пайрем гына огыл, а  политике событий лийын. Салтак- влаклан, элысе калыклан да уло тӱнялан ончыктеныт: Москвам сдатлыме огыл, тудо кредалеш да мучаш марте пеҥгыдын шогаш тӱҥалеш. 
            «Курымашыш тошкалше парад» лӱман программе Никонов лӱмеш площадьыште 12 шагатат 30 минут гыч 14 шагат марте эрта,- увертара олан мэрийже. Тушто радиосем композицийым, патриотик концертым колышташ, салтак пучмыш ден шокшо чайым тамлаш, сар-курал, вургем да кычалше экспедиций- влакын мумо выставкым ончаш лиеш.
           Шымше ноябрьым кугурак тукым эше 1917-ше ийысе Октябрь революцийын кечыже семын шарна. Тудо уло совет жап мучко календарьын йошкар кечыже ыле, СССР-ын кугыжаныш пайремже семын палемдалтын, кажне олаште да кугурак илемлаште шемерын демонстарцийже эртаралтын. Совет ушем шаланыме дене тиде пайремын историйжат мучашлалтын. Но Совет ушемын икмыняр элыштыже, мутлан Кыргызстан ден Беларусьышто, кызытат палемдалтеш. Российыште 7-ше ноябрь ынде кугыжаныш пайрем огыл, но шарнымашан дата- влак перечньыш пурталтын. Тыгай закон- влакым 2005-ше ийыште пенгыдемдыме.
               Фото: МариМедиа

Прошлые выпуски