Таче Россий Вооружённый вийын стратегический назначениян Ракет войскажын кечыже палемдалтеш
Таче Россий Вооружённый вийын стратегический назначениян Ракет войскажын кечыже палемдалтеш. Кумшо степень Кутузов орденан Киевско- Житомирский 14-ше ракет дивизийын военнослужащийже да ветеранже- влакым тиде кече дене Республикым вуйлатыше Александр Евстифеев саламла. Пел курым наре жапыште ракет войска Россий армийын кугешнымашыже, калыкле лӱдыкшыдымылыкын да пеҥгыдылыкшын гарантше улеш, элысе вооруженный вийын ямде улмыжым ончыкта. РВСН-ын военнослужащийже-шамыч сеҥыше-фронтовик- влакын поро йӱлаштым умбакыже шуят, шанчын да техникын у сеҥымашыштым кучылтыт. Воин- ракетчик- влак кече еда шкеныштын эн сай качествыштым ончыктат: чытымашым, моштымашым, шындыме задачым чаткан да писын ыштен кертмыштым пеҥгыдемдат. Тиде кечын ме кугешнен РВСН-ын Марий Элыште верланыше ик эн чапле соединенийжын военнослужащийже- влакым чапландарена. Кугу таум ветеран- влаклан ойлена. Нуно ятыр ийла дене ракет войскан военный куатшым ыштен, пеҥгыдемден толыныт. Кызытат нуно элнан аралалт кертме йӧнжым арален кодымашке шке надырыштым пыштат. Чыла военнослужащийлан пиалым, пеҥгыде тазалыкым, улан илышым, сай кумылан да боевой ямдылыкыште лияш тыланем,-ойлалтеш республикым вуйлатышын саламлымашыштыже.
