Теҥгече уэмдыме Тимофей Евсеев лӱмеш калыкле тоштерыш Марий Элым вуйлатыше Александр Евстифеев миен

                 Марий Эллан 100 ий темме идалыкыште республикысе ик эн тошто тоштерым олмыктымо. Теҥгече уэмдыме Тимофей Евсеев лӱмеш калыкле тоштерыш Марий Элым вуйлатыше Александр Евстифеев миен. Тӱҥ корпусышто пашам республикын лӱмгечыже радамыште ыштыме. Тоштер шкежат тений 100 ияш лӱмгечыжым палемден. Олмыктымо пашалан 14 миллионат 500 тӱжем теҥге оксам кучылтмо. Окна- влакым тичмаш вашталтыме, пырдыжым тӧрлен шымартыме, кӱварым, тувырашым, тӱжвал пырдыжым, тошкалтыш- влакым, фойем, выставке залым, гардеробым, санузелым да молымат олмыктымо. Экспозиций- влакымат уэмдыме. Историй пӧлкан кугурак шанче пашаеҥже Сергей Свечников Александр Евстифеевлан «Марий Элын калыкле тоштержылан 100 ий» тоштерым ончыктен да тӱвыра тӧнежын вияҥ толмо тӱҥ йыжыҥже- влак дене палдарен. Вуйлатышылан моло экспозиций-влакымат ончыктымо, ончыкылык план дене палдарыме. Республикым вуйлатыше олмыктымо пашам аклен да коллективлан тыршен ыштымыжлан таум каласен. Мучашлан тудо республикысе калыкым да турист- влакым уэмдыме тоштерыш мияш да республике дене келгынрак палыме лияш ӱжын ойлен. У ий пайрем годым тоштер кокымшо  январь гычак ончаш толшо- влакым вуча.

Прошлые выпуски