Идалык мучаш марте республикыште 260 тулык йоча пачеран лиеш
Идалык мучаш марте республикыште 260 тулык йоча пачеран лиеш. Кодшо кечылаште тулык йоча да ашнаш налше еш- влаклан полышым пуымо шотышто пашаче группын заседанийже лийын. Тудым Марий эл Кугыжаныш Погын вуйлатышын алмаштышыже Наталья Козлова вӱден. Погынымашын тӱҥалтышыштыже Туныктыш министерствын йоча жапым социал аралтыш, опека да попечительстве пӧлкажым вуйлатыше Михаил Овчинников тулык- влаклан илыме верым ситарыме нерген ойлен. Икымше декабрьлан шотлымаште, 23 ийыш шушо да пачерым налшаш тулык йоча- влакын спискыштышт тӱжемат 708 еҥ шотлалтын. Тений нунылан илыме верым налаш бюджет гыч 340 миллион теҥгем ойырымо. Идалык мучаш марте 260 тулык еҥлан илыме верым налын пуымо лиеш. Тиддеч посна эше 88 илыме верым чоҥаш окса ужашым тӱлымӧ. Пашаче группын еҥже- влак полышым пуымо моло йодышымат каҥашеныт. Туныктыш министерствыш ашнаш налме ешлаште мыняр тулык йочан улмыжо, тулык йоча- влаклан кугыжаныш да кугыжаныш огыл тӧнежлаште мыняр йочан илымыже нерген ешартыш увертым погаш йодмашым колташ темлыме. Пашаче группын черетан заснданийже шушаш ийын февралыште лийшаш.
