Татарстанысе тӱҥ федерал инспектор Йошкар-Ола гыч рвезын У ий кумылжым шуктен

                Татарстанысе тӱҥ федерал инспектор Йошкар-Ола гыч рвезын У ий кумылжым шуктен. «Шонымашым шуктышо кож» поро кумыл акций кышкарыште йоча пӧртлаште илыше, неле илыш йыжыҥыш логалше, начаррак тазалыкан, тыгак нелылык дене тӱкнышӧ илалше еҥ- влак У ий вашеш пӧлекым налыт. Акций уло элна мучко да Юл кундем округыштат эрта. Тыге Йошкар-Ола гыч Николай Кузнецовын шонымашыжым шуктымо. Тудо метрополитен поездын машинистше лийын ончаш шонен коштын. Николай 7 ияш, тудо шуко шочшан еш гыч, метро теме дене пеш кумылаҥын: «Москосо метрополитенын» чыла выпускшым онча, метро составым сӱретла, метром палыме шотышто мӧҥгыштыжӧ викторина- влакым эртара. Юл кундем округышто полномочный представитель Игорь Комаровын лӱмжӧ дене Татарстан республикысе тӱҥ федерал инспектор Виктор Демидов Колям Озаҥыш метрополитенын электропоездыштыже машинист дене ик кабиныште кудал ончаш  ӱжын. «Дубравный» станцийыште Николайым ача-аваже дене пырля Тӱҥ федерал инспектор, Татарстанын транспорт министржын алмаштышыже Айрат Садыков, Метроэлектротрансын генеральный директоржо Айдар Абдулхаков да метрополитенын пашаеҥже- влак вашлийыныт. Рвезылан машинистын пашажым ончыктеныт, электродепо марте кудал эртеныт. Депошто экскурсийым эртареныт, тунемме классыш миеныт, Йӱштӧ Кугыза ден Лумӱдыр  у ий дене саламдленыт да пӧлекым кучыктеныт.
          Фото: Марий Элысе ГФИ-н пресс-службыжо.

Прошлые выпуски