Тений пачерым шукырак чоҥымо

        Тенийсе 9 тылзе жапыште республикыштына кум тӱжемат 246 пачерым чоҥымо. Нунын тӱшка кумдыкышт 227 тӱжем квадрат метрым эртен. Кодшо ийысе тыгаяк жап дене таҥастарымаште кумдыкшо кандаш утла процентлан шукырак лийын. Январь гыч сентябрь марте еҥ- влак шке кӱшеш да кредитор- влакын полшымышт дене 834 пӧртым нӧлтеныт. Тӱшка кумдыкшо 102 тӱжем квадрат метрым эрта. Тидыже кодшо ийысе деч 13 процентлан шагалрак. Калыкын чоҥымыжо республике мучко тӱшка чоҥымо деч 45 процентыш погына.
      2019-ше ийыште «Шке кӱлешлыклан сад пакчам кучымо да Российысе южо законыш вашталтышым пуртымо нерген» федерал законын нормыжо кучалталташ тӱналме дене кодшо ийысе август гыч сад пакчаште илаш чоҥымо пӧрт- влакат шотыш налалтыт. Но кодшо ий август гыч сад пакчалаште ик илыме пӧртымат чоҥымо огыл. 
      Чоҥымо пачерын да посна пӧртын кокла кугытшо тений 70 квадрат метр лийын, а кодшо ийын 79 утла квадрат метр ыле. Шуко пачеран пӧрт- влакым Йошкар-Ола ден Волжскышто, Волжский, Медведево да Звенигово районлаште чоҥымо. А моло районлаште да Козьмодемьянск олаште посна илыме пӧрт- влакым гына ыштыме.

Прошлые выпуски