Правительстве пӧртыштӧ корным чоҥымо йодышым каҥашыме
Правительстве пӧртыштӧ «Лӱдыкшыдымӧ да сай качестван автомобиль корно- влак» калыкле проектын «Корно сеть» регионысо проектшым шыҥдарымашым каҥашыме. Тиде теме дене совещанийым Республикым вуйлатыше Александр Евстифеев эртарен. Залыш правительствын, министерство ден ведомствылан еҥышт погыненыт, видеокыл дене муниципалитет- вуйлатыше- влак лийыныт. Республикым вуйлатыше палемден: калыкле проектым шыҥдарыме кышкарыште республике федерал бюджет гыч корным олмыкташ да чоҥаш окса полышым налеш. Пашам ыштыме годым чыла йодмашым шуктыман, поснак пашан качествыжлан кугу тӱткышым ойырыман. Республикын транспорт да корно озанлык министрже Александр Герасименко увертарен: тенийлан корно фондын кугытшым республикысе бюджет вич миллиардат 400 миллион теҥгем палемден. Тушечын ик миллиардат 200 миллион теҥгеже- федерал бюджет гыч субсидий. 406 миллион теҥге окса ял кундемлам комплексно вияҥдаш колталтеш, кок миллардат 800 миллион теҥгеже корно шотышто калыкле проектым шыҥдараш, 160 миллион теҥгеже- корно лӱдыкшыдымылыкым ышташ. Тыгак вич миллион утла теҥге ял кундемлаште корнылан проектым ышташ колталтшаш, миллиардат пелыже республике кӱкшытан корнылам олмыкташ, капитально ачалаш да кучаш кайышаш. Корно паша республикысе кок кугыжаныш программе дене шукталтеш. Тиде- «2025-ше ий марте корно озанлыкым вияҥдымаш» да «2014-ше 2025-ше ийлаште Республикыште ял озанлыкым вияҥдымаш да ял озанлык продукций, сырье да кочкыш сату рынкым виктарымаш» программе-влак.
