Тений оласе промышленный производство палынак кушкын
Оласе промышленный производство тенийсе индеш тылзыште 35, 9 процентлан кушкын. Олаште илыме негызым промышленный предприятий- влак ыштат. Тиде -машинам чоҥымаш, пушеҥгым обрабатыватлымаш, химий промышленность, чоҥымо материалым да кочкыш сатум лукмаш. Тений икымше октябрьлан шотлымаште, продукцийым лукшо 963 промышленный организаций пашам ышта. Тушечын 883-шо обрабатыватлыше производство. Кугурак ужашыже ямде кӱртньӧ изделийым лукшо, пушеҥгым обрабатыватлыше да пу гыч сатум лукшо организаций- влак улыт. Маристатын ончыктымыж почеш, 9 тылзе жапыште предприятий- влак 55 миллиард теҥгеаш сатум колтеныт. Производствын индексше кодшо ийысе дене таҥастарымаште 136 наре процентыш шуын. Таҥастарашлан: республике мучко тудо 109 процент, Россий мучко 103 процент улеш. Кушмаш поснак электрон да оптик сатум лукмаште, металлургический производствышто, ямде кӱртньӧ сатум ыштымаште, полиграфий пашаште палдырна. 9 тылзе жапыште кодшо ийысе деч шукырак йӱкшыктарыме да кылмыктыме шыл сатум, чулка-носким, пу окна рамым, шӧрым, чоҥымо растворым, кӱртньӧ бетон конструкцийым, кӱртньо омсам, йӱкшыктарыше камерым ыштен лукмо.
