Географий дене шинчымашыжым тӱжемат ныл шӱдӧ еҥ терген
Октябрьын пытартыш рушарнянже Марий Элыште визымше гана «Географий диктант» шинчымашым шарыше тӱнямбал акций эртен. Тудым Руш географический общество ямдыла. Марий Элыште диктантым 22 площадкыште чыла ола ден районлаште возеныт. Географий дене шке шинчымашыжым тӱжемат 400 еҥ терген. Эн кугу площадкыже Юлтехыште лийын. Тушко возаш 350 еҥ погынен. Тӱнямбал космический станцийын бортшо гыч вияш видеокыл йӧн дене диктантыш ушнышо- влакым Роскосмосын космонавтше- влак Александр Скворцов ден Олег Скрипочка саламленыт. Диктантыште 40 йодыш лийын. Нуным Никита Михалков, мурызо Сергей Шнуров да телевӱдышӧ Мария Ситтель йӱкаҥденыт. Марий Эл дене кылдалтше 15 йодышым ешарен пуртымо. Лектышыжым 29-ше ноябрьыште пален налаш лиеш.
