Йошкар-Оласе перинатал рӱдерым чоҥаш федерал бюджет оксам пеҥгыдемден
Федерал бюджетыште республикын ӱшандарышын йодмыж почеш Йошкар-Оласе Перинатал рӱдерым пужен ышташ оксам палемден кертме. Медицинылан кӱлешан объектым чоҥымо нерген правительстве пӧртыштӧ Республикым вуйлатыше Алекандр Евстифеев тазалыкаралтыш министр Марина Панькова дене мутланен. Министр ушештарен: Россий Президентын кӱштымашыжым шуктымо кышкарыште «Тазалыкаралтышын тӱҥалтыш звеножым уэмдыме принцип- влакым пеҥгыдемдыме нерген» пунчалым лукмо. Тиде пунчал почеш республике пашашке тӱрыс ушнен. Тӱҥалтыш медико-санитар полышым пуышо организаций да Йошкар-Оласе поликлиника-влакын паспортышт ышталтеш. Кызытсе йодмашлан келшен толдымо поликлинике- влакым модернизироватлымаш пеш кугу рольым модеш. Сандене ойырымо окса почеш контракт- влакын пеҥгыдемдыме, Козьмодемьянскыште поликлиникым чоҥымо паша мучашыш лишемеш. Тений ыштышаш пашам тӱрыс шуктымо лиеш. Чоҥымашыже шушаш ийын апрельыште мучашлалтшаш. Тыге Курык марий, Юрино район- влак да Козьмодемьянск олалан эмлыме вер почылтшаш. Тиддеч посна Российын бюджетшым ончымо годым Йошкар-Олаште кӱкшӧ технологиян перинатал рӱдерым чоҥаш оксам пеҥгыдемдыме. Кызыт чоҥашлан чыла документаций ямдылалтеш. Шушаш ийын чоҥымо паша тӱҥалшаш. Оборудованийым налашат документ ышталтеш. Кызыт чоҥышаш кундемым ямдылаш тӱҥалме, - мучашлен министр.
