Волжск оласе поликлинике мотор да йӧнан лиеш

Волжск оласе рӱдӧ поликлинике йӧршын тӱсшым вашталта. Кызыт тушто олмыктымо паша кая. Тудым шукташ Марий Эл Правительствын субсидийым ойырымыжлан кӧра йӧн лектын. Пытартыш гана тушто олмыктымо паша 2017-ше ийыште эртаралтын. Тунам икымше пачашысе холлым уэмыдме, виш регистратура почылтын. Тений кокымшо пачашым олмыктат. Тушто рентгенограф, маммограф, терапевт- влакын да аҥысыр специалист- влакын пӧлемышт, кумда холл верланеныт. Тӱҥ врач Дмитрий Фризинын мутшо почеш, дизайн-проектше икымше пачашымак ушештара. Холл, медшӱжар- влакын постышт, коридор, санузел олмыкталтеш. Кызыт окна- влакым, проводкым, кӱвар шартышым вашталтыме. Пашам 15-ше сентябрь марте мучашлаш шонат. Тиддеч вара у мебельым налыт. Чыла пашалан вич миллион наре теҥге оксам ойырымо.

Прошлые выпуски