Волжскышто кок самырык ешлан шке илемым налаш полшат
Волжскышто кок самырык ешлан шке илемым налаш полшат. Ола гыч Прохоровмыт да Кузнецовмыт еш илыме йӧным саемдаш кугыжаныш деч социал оксам налыт. Тыгай правашт улмо нерген нунылан свидетельствым кучыктымо. Еш- влаклан окса полыш «Российын гражданже- влаклан йӧнан илыме верым да коммунал полышым ситарымаш программе кышкарыште пуалтеш. Ондак тудо «Самырык ешлан илыме вер» маналтын. Социал оксам налаш правалан свидетельствым Волжск администрацийым вуйлатышын алмаштышыже- влак Сергей Лазарев ден Людмила Новосёлова кучыктеныт. Кок ешыжат ик миллионат 700 тӱжем теҥгем налеш. Тидыже илыме верын ончылгоч шотлымо акшын 35 процентше лиеш. Оксам ипотекым петыраш, илыме верлан тӱналтыш взосым тӱлаш, оксам пыштен чоҥаш, шке пӧртым нӧлташ кучылташ лиеш. Елена ден Артём Прохоровмыт пӧртым налаш шонат. Кузнецовмыт еш кок олаште илат. 2019-ше ийыште Йошкар-Олаш кусненыт. Программыш 2012-шо ийыште пуреныт. Январьыште черетышт шуын манын увертареныт. Оксам Йошкар-Олаште пӧртым налаш налме ипотекым пӧртылташ кучылтыт. Кок ешыжат кугыжанышлан тыгай полышлан таум каласеныт. Волжск олаште кызыт илыме верым саемдашлан спискыште 49 самырык еш шотлалтеш.
Фото: Марийская правда.
Фото: Марийская правда.
