Волжскышто кудымшо номеран школым чоҥаш решенийым лукмо

Волжскышто кудымшо номеран школым чоҥаш решенийым лукмо
              Кудымшо номеран школым чоҥаш решенийым лукмо. Кодшо арня мучашыште Марий Элым вуйлатыше Юрий Зайцев паша дене Волжск олаш миен. Визит жапыште Юрий Зайцев деке оласе общественный советын еҥже Давид Погосян 6-шо номеран школым чоҥымо нерген йодын. Республикым вуйлатыше каласен: тунемме тӧнежым ышташ лийме нерген йодышым Федераций Советыште Республикын кечыжым эртарыме годым Федеарций Советым вуйлатыше Влентина Матвиенко да просвещений министр Сергей Кравцов дене каҥашыме. Йодыш пӱсын шога. Школым аварийныйлан шотлымо, тушто тунемаш ок лий. Школым чоҥымо йодыш просвещений министерствын программышкыже пурталтын. Тудыжо Россий Правительствыште каҥашымаште улеш. Тиддеч вара Юрий Зайцев нылымше школ негызеш ыштыме кванториумыш миен. «Туныктыш» калыкле проектлан кӧра йоча технопарк таче пашам ышташ тӱналын. Аудиторийлам олмыктымо. Тушко у мебельым, техникым налме. Химий, физике, физиологий да экологий дене цифран лабораторий- влакым ыштыме, робототехникым, 3Д моделированийым, промышленный дизайным шымлаш йӧным ыштыме. Тиде пашалан 21 миллион утла теҥгем ойырымо ыле. Кодшо ийын нылымше номеран школым капитально олмыктымо. Тиде пашалан 94 миллион теҥгем кучылтмо. Тений школ «Пилотдымо авиций системе» калыкле проектым шыҥдарымаште участвоватла. Школыш квадрокоптерым, ноутбукым да моло кӱлеш оборудованийым налме.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски