Морко районысо 10 ял пӱртӱс газ деке ушнаш йӧным налын
Морко районысо 10 ял пӱртӱс газ деке ушнаш йӧным налын. Кугу Кожлаялыште посёлкыла кокласе газпучым пашаш колтымо дене кылдалтше торжественный церемоний эртен. Мероприятийыш Марий Элым вуйлатыше Юрий Зайцев, «Газпром межрегионгаз» ушемын генеральный директоржын алмаштышыже Сергей Табачук миеныт, ялысе калык погынен. Посёлкыла кокласе 25 меҥге кужытан газпучым республикыш газым пуртымо да газым ситарыме программе кышкарыште чоҥымо. Ынде тушко Рушродо, Нуръял, Кугу Кожлаял, Изи Кожлаял, Нӧрепсола, Чишкан, Волаксола, Чодырасола, Пумыр ялласе да Зеленогорск посёлкысо калык ушнен кертеш. Яллаште посёлкыла кокласе ыштен шуктымо газпучын кужытшо 18 меҥгым эртен. Республикым вуйлатыше палемден: Марий Эл элна мучко газым пуртымо дене кумшо верыште улеш. Таче кечылан республикым газ дене 88 утла процентлан авалтыме. Юрий Зайцев ден Сергей Табачук Петровмыт ешыш миеныт да нуным вучымо событий- газ толмо дене саламленыт. Нуно тыгак пашаче вашлиймашым эртареныт да 2025-ше ий марте газым пуртымо программым каҥашеныт. Программе почеш 60 ялыш газым пурташ палемдыме. Тидыже куд тӱжем утла суртыш газым пурташ йӧным пуа. Тиддеч посна 20 котельныйым газым кусараш палемдыме. Марий Элым вуйлатыше дене пашаче вашлиймашыште Сергей Табачук «Газпром межрегионгаз Йошкар-Ола» ушемын у генеральный директоржо Михаил Владимиров дене палымым ыштен. Тудым Директор-влак Советын решенийже почеш тиде должностьыш шогалтыме.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
