Шымше созыв Марий Эл Кугыжаныш погынын иктешлыше 49-ше сессийже пашам ыштен
Теҥгече шымше созыв Марий Эл Кугыжаныш погынын иктешлыше 49-ше сессийже пашам ыштен. Заседанийыште Марий Элым вуйлатыше Юрий Зайцев участвоватлен. Тудо депутат- влаклан калыкын илышыжым саемдышаш верч пырля пашам ыштымлан тауштен ойлен. Вич ий жапыште Кугыжаныш Погынын 49 заседанийжым эртарыме. Тушто республикын 336 законжым пеҥгыдемдыме. Пытартыш вич ий неле решений да тергымаш дене кылдалтше жап лийын: ковид пандемий, лӱмын эртарыме сар операций, элнан экономике системыжым пужен ыштымаш, Конституцийым вашталтымаш, Российын президентшым да республикым вуйлатышым сайлымаш. Кугыжаныш Погынын депутатше- влак илышыш у йодмашыже- влаклан тӱрыс вашештен кертыныт, депутат корпус профессионализмын сай кӱкшытшым ончыктен. Юрий Зайцев ешарен: республикысе чыла кучем ончылно эше шуко задаче шога. Нуным правительстве дене пырля парламентын у составше виктараш тӱналеш. Тудыжо икымше погынымашке иктаж тылзе наре жап гыч чумырга. Погынын ончыкылык составшат тыгаяк чолга да профессионал лиеш манын ӱшаным каласен. Республикым вуйлатыше депутат- влаклан пырля пашам ыштымылан тауштен да награде- влакым кучыктен.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
