Волжскышто кугурак тукымын вашлийме рӱдерже почылтын

Волжскышто кугурак тукымын вашлийме рӱдерже почылтын
              Волжскышто кугурак тукымын вашлийме рӱдерже почылтын. Июнь мучашыште тудо  Волжскышто Россий социал фондын пӧлкажын клиент службыжо негызеш пашам ышташ тӱналын. Оласе ветеран-влак совет рӱдерын икымше унаже- влаклан концертым ямдылен. Артист- влак Россий нерген мурым руш да марий йылме дене йоҥгалтареныт. Верысе кидмастар- влак ончерым ямдыленыт да шке кид дене ыштыме модышым, салфеткым, картиным ончыктеныт. Посна верым тушто пидме курчак- влак налыныт. Нуным Волжскысо ветеран- влак советым вуйлатыше Галина Макарова пидеш. Вашлийме рӱдерыште мастар-классым эртарыме, кином ончымо, каныме, лудмо вер- влак улыт. Рӱдерым интернетан компьютер, сылнымут, ӱстембал теннис дене пойдарыме. Мийыше- влаклан  пенсий, финанс, компьютер грамотность, физкультура дене занятий- влакым эртарат, сылнымут кас, оҥай еҥ- влак дене вашлиймаш- влакым чумырат. Кугурак тукымын вашлийме рӱдерже Волжск оласе Ленин урем, 53-шо пӧртеш верланен.
        Фото: Социал фонд пӧлка.

Прошлые выпуски