Вуйым пыштыше вреч-педиатрлан шарнымашан оҥам почмо
Марий Элым вуйлатыше Юрий Зайцев профессионал порысым шуктымо годым вуйым пыштыше вреч-педиатр Наталия Костровалан шарнымашан оҥам почмаште участвоватлен. Мемориал оҥам Медведево районысо рӱдӧ эмлыме верын йоча поликлиник пӧлкажын пырдыжешыже вераҥдыме. Тушто самырык врач кок ий пашам ыштен. Наталия Кострован илышыже Запорожский областьыште корно происшествий годым кодшо ийын 7-ше декабрьыште кӱрылтын. Медицина пашаеҥ- влакын мобильный бригадышт изи пациент- влак деке кая улмаш. Чрезвычайный жапыште медицина полышым пуымо годым шкем чаманыде тыршымылан Наталия Костровам (колымекыже) Пироговын орденже дене палемдыме. Мемориал оҥам почмаште Марий Элым вуйлатыше Юрий Зайцев, Наталия Кострован ава ден ачаже Наталья Алексеевна ден Николай Иванович, пырля пашам ыштыше йолташыже- влак, верысе калык лийыныт. Наталья Алексеевна Марий Элым вуйлатышылан, Тазалыкаралтыш министерствылан, медицина тӧнежын коллектившылан полшен шогымыштлан таум каласен. Медведево районысо рӱдӧ эмлыме верын коллектившын Наталия Костровам шарнымашеш кодаш тӱҥалтышыжым Республикым вуйлатыше сайлан шотлен да тений икымше сентябрь гыч йоча пӧлкалан Наталия Кострован лӱмжым пуымо.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
