Йошкар-Олаште кычалше студент отряд- влакын Россий кӱкшытан визымше слётышт умбакыже шуйна
Теҥгече Йошкар-Олаште кычалше студент отряд- влакын Россий кӱкшытан визымше слётышт тӱҥалын. Тушко элысе 34 регион гыч делегаций- влак толыныт. Почётан уна- влак коклаште самырык- влакын пашашт шотышто федерал агентствым вуйлатышын советникше Сергей Степанов, Юл кундем округышто Россий президентын полномочный представительын полышкалышыже Владимир Колчин, «Российын кычалше толкынжо» ушемын ответственынй секретарьже Елена Цунаева да молат лийыныт. Визымше слётым официально Марий Элым вуйлатыше Александр Евстифеев почын. Тудо палемден: слётым эртарыме верлан Марий Элым таклан огыл ойырен налме. Республикыште самырык тукымым патриотизм шӱлышеш шуарыме шотышто кугу паша шукталтеш, 92 кадет класс, 144 юнармий отряд, 83 военно- патриот клуб уло. Тушто 9 тӱжем наре ӱдыр-рвезе шуаралтеш. Ныл кычалше ушем пашам ышта: «Демос» отряд, студент- влакын «Воскресение» отрядышт, Волжск оласе «Защитник» отряд, Шойбулак школ пелен кычалше отряд. Вич ий жапыште 20 утла экспедицийым эртарыме, 100 салтакын лулегыжым муын, уэш тойымо, увер деч посна йомшо кум тӱжемат 500 утла еҥын пӱрымашыжым рашемдыме. Кум кече жапыште Слётыш погынышо- влак шинчымашым нӧлтымо да тӱвыра программылаште, мастер-класслаште лийыт, пӱсын шогышо йодыш- влакым каҥашат.
